Grischun - Cultura da bajegiar

Il 1900 ha l'Uniun grischuna d'art cumenzà ad installar la collecziun d'art. Oz èsi l'incumbensa da la Fundaziun collecziun grischuna d'art d'acquistar ovras per il Museum d'art dal Grischun. La collecziun cumpiglia en il fratemp var 6000 lavurs da tut ils secturs da l'art figurativ da la mesadad dal 18avel tschientaner fin al temp dad oz. Ina part da questa collecziun è exponida permanentamain en la Villa Planta. I sa tracta oravant tut d'ovras d'artistas e d'artists grischuns u svizzers. Cun gruppas d'ovras cumplessivas èn represchentads Angelika Kauffmann, Giovanni Segantini, Augusto Giacometti, Giovanni Giacometti, Alberto Giacometti, Ferdinand Hodler, Ernst Ludwig Kirchner, ils represchentants da la gruppa 'Rot-Blau' ed artistas ed artists grischuns contemporans sco Matias Spescha, Not Vital, Elisabeth Arpagaus u Pascale Wiedemann.
En l'edifizi da Sulser han lieu mintg'onn var sis exposiziuns. Sper exposiziuns d'ovras d'artistas e d'artists istorics e contemporans dal Grischun, han lieu adina puspè retrospectivas d'artistas e d'artists svizzers impurtants ed en intervals regulars era preschentaziuns d'art contemporan internaziunal.